धनोरा (दुर्ग) - 22 मार्च के बिहान, तुलसी पैलेस धनोरा म अंतर्राष्ट्रीय महिला दिवस के अवसर म जीविका स्व सहायता समूह अऊ हमर हटरी बाजार बोरसी के संयुक्त तत्वाधान म भव्य सम्मान समारोह के आयोजन करे गीस। ए कार्यक्रम म समाज सेवा, संस्कृति अऊ जनजागरण के क्षेत्र म सक्रिय संस्था झांपी हमर चिन्हारी परिवार ल विशेष रूप ले सम्मानित करे गीस।

कार्यक्रम के मुख्य अतिथि छत्तीसगढ़ शासन के महिला एवं बाल विकास मंत्री  लक्ष्मी राजवाड़े रहिन, जेनकर हाथ ले झांपी परिवार ल सम्मान प्रदान करे गीस। कार्यक्रम के अध्यक्षता दुर्ग ग्रामीण विधायक अऊ छत्तीसगढ़ राज्य ग्रामीण अन्य पिछड़ा वर्ग आयोग के उपाध्यक्ष ललित चंद्राकर करिन।

झांपी हमर चिन्हारी परिवार के ओर ले संयोजक महेश गुप्ता, सहसंयोजक अनुराधा मिश्रा, अजय हिरवानी, दिलेश ठाकुर अऊ हर्ष साहू कार्यक्रम म उपस्थिति देके संस्था के सक्रिय योगदान ल प्रस्तुत करिन।

झांपी हमर चिन्हारी परिवार के परिचय

झांपी हमर चिन्हारी परिवार एक सामाजिक अऊ सांस्कृतिक संस्था हवय, जेन ह छत्तीसगढ़ के लोकसंस्कृति, लोककला, लोकसाहित्य अऊ परंपरा के संरक्षण अऊ संवर्धन बर निरंतर काम करत हे। संस्था के मुख्य उद्देश्य छत्तीसगढ़ी भाषा-बोली, रीति-रिवाज अऊ लोक परंपरा ल नई पीढ़ी तक पहुंचाना अऊ समाज म जागरूकता फैलाना हे।

ए संस्था समय-समय म सांस्कृतिक कार्यक्रम, साहित्यिक गोष्ठी, नाटक, लोकनृत्य, कवि सम्मेलन अऊ सामाजिक जागरूकता अभियान के आयोजन करत रहिथे। झांपी परिवार समाज के जरूरतमंद वर्ग, महिला समूह, युवा मन अऊ कलाकार मन ल मंच देके उनकर प्रतिभा ल सामने लाने के काम घलो करत हे।

साथे-साथ संस्था स्वच्छता, शिक्षा, स्वास्थ्य अऊ सामाजिक एकता जइसने मुद्दा म घलो सक्रिय भूमिका निभावत हे, जेन ले समाज म सकारात्मक बदलाव दिखत हे।

कार्यक्रम म विशेष अतिथि के रूप म जिला पंचायत दुर्ग के अध्यक्ष सरस्वती बंजारे, नगर निगम महापौर अलका बाघमार, महिला बाल विकास के पूर्व मंत्री रमशीला साहू, समाजसेवी रजनी बघेल, प्रसिद्ध पंडवानी गायिका उषा बारले अऊ रुकमणी चतुर्वेदी सहित धनोरा के सरपंच रुलेश्वरी बंजारे के गरिमामयी उपस्थिति रही।

ए अवसर म जिला भाजपा अध्यक्ष सुरेंद्र कौशिक, जिला साहू संघ अध्यक्ष नंदलाल साहू, सतनामी समाज अध्यक्ष शीतल कोठारी, कुर्मी समाज अध्यक्ष प्रदीप चंद्राकर अऊ यादव समाज अध्यक्ष बोधन राम यादव घलो उपस्थित रहिन।

जीविका स्व सहायता समूह के अध्यक्ष ललेश्वरी साहू बताइन के कार्यक्रम के दौरान रेड ड्रॉप फाउंडेशन भिलाई-दुर्ग के सहयोग ले रक्तदान शिविर के आयोजन करे गीस, जिहां बड़ी संख्या म लोगन मन भाग लेइन। रक्तदाताओं ल हेलमेट अऊ प्रमाण पत्र देके सम्मानित करे गीस।

ए कार्यक्रम म समाज के अलग-अलग क्षेत्र म उल्लेखनीय योगदान देइया मन ल घलो सम्मानित करे गीस, जेमे शिक्षा, पुलिस प्रशासन, स्वास्थ्य विभाग, समाज सेवा, स्वच्छता समूह के बहिनी, मितानिन, स्व सहायता समूह के सदस्य, गर्भवती महतारी मन अऊ पत्रकार-मी़डिया कर्मी शामिल रहिन।

पूरे आयोजन म महिला सशक्तिकरण, समाजिक एकता अऊ सेवा भावना के सुघ्घर संदेश देखे ल मिलिस। झांपी हमर चिन्हारी परिवार के सम्मान ले संस्था के काम ल नई पहचान मिलिस अऊ आने वाला समय म घलो समाज हित म ए संस्था प्रेरणा के स्रोत बने रहिही।